Kombëtarja shqiptare gjithmonë ka pasur probleme me futbollistët që rriten jashtë vendit dhe bëhen profesionistë në shtete të ndryshme, pasi në fund jo të gjithë preferojnë ngjyrat kuqezi. Shkëlqimi i tyre jashtë vendit është i qartë që vjen pasi trajnohen me rregull dhe disiplinë, por edhe infrastruktura që u ofrohet është në kushte mjaft të mira. Për këtë arsye dhe për karrierë më të mirë, ndonjëherë djemtë e rinj zgjedhin të përfaqësojnë vendin ku janë rritur.
Por ka disa prej tyre që nuk e ndërrojnë vendin e tyre me asnjë tjetër dhe rriten me frymën kuqezi. I tillë është edhe talenti 19-vjeçar Drilon Kryeziu, i cili ka lindur në Slloveni, është i ditëlindjes 1999 dhe luan për një klub vendas, NK Triglav Kranj. Ndërkohë, ai ka zgjedhur që të luajë për Shqipërinë U-21, që drejtohet trajneri Alban Bushi.
Kujtojmë që ekipi i Shpresave do të luajë sonte në orën 20:00 ndaj Spanjës U21, në stadiumin “Nuevo Arkangel” në Cordoba. Shqipëria nuk do të ketë asnjë mungesë në këtë përballje mjaft të vështirë. Kuqezinjtë e Bushit ndodhen në vendin e parafundit me 6 pikë, ndërsa iberikët mbajnë vendin e parë me pikë të plota në grup.
