Drejtori i Përgjithshëm i Burgjeve Agim Ismaili ka raportuar në Komisionin e Sigurisë situatën në burgje. “Janë porositur vrasje nga burgu, do raportohen në Prokurori. Jemi gati të implementojmë sistemin 41 bis në burgje. Synim masën ndëshkuese për të burgosurit me rrezikshmëri të lartë. Kemi 32 të ndëshkuar për thyerje të rregullave të burgut. Ka një ulje të të dënuarve në burgje. Është dyfishuar fondi për uniformat në vitin 2019. Kemi investuar në spitalet e burgjeve”, deklaroi ndër të tjera Ismaili.
Ky i fundit theksoi se një nga vështirësitë e tij si drejtues ka qenë zbatimi i rregullit të telefonatave: “Të burgosurit duhet të bëjnë 8 telefonata në muaj, po kjo nuk zbatohet. Janë marrë masa që kjo të zbatohet sa më shpejt. U kemi kërkuar të burgosurve të deklarojnë 10 numra se më kë ata do të flasin. Do të kufizohet koha dhe telefonatat që ata bëjnë. Problemi i parë që kam hasur është trajtimi shëndetësor në burgje. E dyta është lufta ndaj diskriminimit në burgje, për t’i dhënë fund praktikës që një i burgosur ‘VIP” përdor sistemin për të pasur benefite, për t’i dhënë fund dhe secili të vuajë dënimin si gjithë të tjerët”.
