Ambasada Amerikane në Tiranë ka reaguar pas publikimit të një pjese të raportit paraprak të Komisionit të Venecias.
Përmes një postimi në Facebook, ambasada fton palët që të respektojnë procesin e ‘Venecias’. Gjithashtu ajo i ka kërkuar atyre që të respektojnë edhe kërkesën për konfidencialitet të projekt-opinionit deri sa të finalizohet.
Raporti paraprak në lidhje me përzgjedhjen e gjyqtarëve në Gjykatën Kushtetuese, të hartuar nga Komisioni i Venecias pritet që të mbërrijë këtë fundjavë.
Postimi i plotë:
Nxisim të gjitha palët që të respektojnë procesin e Komisionit të Venecias, përfshi kërkesën për konfidencialitet të projekt-opinionit deri sa të finalizohet. Mirëpresim vendimin e qeverisë për të mos ndërmarrë veprime të mëtejshme lidhur me legjislacionin përkatës derisa opinioni të finalizohet. Po ashtu mirëpresim deklaratën e bërë nga Presidenti Meta gjatë konferencës së tij për shtyp me Presidentin e Bullgarisë, duke afirmuar rëndësinë e një vendimi pozitiv nga BE për të hapur negociatat drejt anëtarësimit për Shqipërinë. Duhet të qëndrojmë të përqendruar tek ajo që ka më shumë rëndësi – sundimi i ligjit dhe e ardhmja e Shqipërisë në Evropë.
