Këshilli i Rregullores dhe Mandateve është rimbledhur për të shqyrtuar kërkesën e prokurorisë mbi heqjen e mandatit dhe marrjen e autorizimit për t’i hapur rrugë arrestimit të ish-ministrit të Brendshëm, Saimir Tahiri. Prokurori që po udhëheq hetimin, Besim Hajdarmataj ka theksuar se prokuroria ka ardhur me prova të reja që lidhen me përfshirjen e ish-ministrin në aktivitetin e trafikut të drogës.
Nga ana e tij, avokati i mbrojtës i ish-ministrit Tahiri, Artan Hajdari theksoi se deri më tani bëhet fjalë për provat që janë bërë publike në media dhe atyre si palë mbrojtëse nuk iu është vënë në dispozicion asnjë material i ri për t’u njohur me provat e reja që mund t’i bashkëngjiten akuzës së Prokurorisë të bëra dy ditë më parë.
Ndërkaq deputeti socialist Ulsi Manja ka kërkuar që prokurori Hajdarmataj të zbatojë procedurën e Këshillit të Mandateve dhe të depozitojë në zyrën e Kuvendit provat e reja në mënyrë që çdo deputet t’i ketë mbi tryezë për të nisur më pas shqyrtimin e tyre.
