Raportuesi për Shqipërinë, Knut Fleckenstein thekson se Tahiri po mbahet nën vëzhgim nga amerikanët dhe ata sipas tij, janë duke e mbajtur në imtësi këtë çështje. Fleckenstein e cilësoi këtë çështje si tejet të veçantë ndërsa shpjegoi se amerikanët janë duke e ndjekur me vëmendje dosjen “Tahiri”.
Raportuesi për Shqipërinë në PE foli gjithashtu edhe për procesin e integrimit e vendit tonë në BE dhe përplasjen e tij me Jean Claude Juncker. Fleckenstein shtoi se zbatimi i Vettingut përbën një rëndësi themelore në drejtim të Integrimit në BE.
Knut Fleckenstein në intervistën për “ABC News”:
“Nuk mund të them me siguri se cila palë ka të drejtë dhe cila gabohet. Në këndvështrimin tim, nëse Prokuroria do të kishte prova të mjaftueshme, duhet të ishte hequr imuniteti për arrestim, por më pas u argumentua që mund të bëhej hetim duke kontrolluar personin dhe banesën e tij, pa qenë nevoja për arrestim.
Nuk e di ç’është e drejtë apo jo, pasi nuk kam folur me Prokurorinë. Gjithsesi, nuk e kuptoj se ç’lidhje ka kjo me procesin e Vettingut, pasi procesi i Vettingut ka të bëjë me skanimin e prokurorëve dhe gjyqtarëve për funksionimin e sistemit të ri të drejtësisë. Ndërsa çështja për të cilën po flasim është një çështje e veçantë. Di që Prokuroria e Krimeve të Rënda të Shqipërisë, mund të vazhdojë hetimet dhe të shpresojmë që asnjë nuk do zhduket ndërkohë. Kam gjithashtu informacione nga kolegët e mi amerikanë, se ata po e shohin këtë çështje me vëmendje”
