Komisioni Qendror i Zgjedhjeve i ka dhënë sot mandatin Elena Xhinës si deputete e PDIU-së.
Xhina e fitoi mandatin pas dorëheqjes së deputetit të PDIU-së, Bujar Muço, i cili u shpreh se dorëhiqej nga mandati i deputetit për arsye personale.
Kështu, KQZ i ka dhënë mandatin kandidates që është pas Muços në listën e PDIU në Elbasan.
Komisioni Qendror i Zgjedhjeve, në mbledhjen e ditës së sotme shqyrtoi dhe miratoi projektvendimet:
“Për dhënien e mandatit të deputetit te Kuvendit, kandidatit të listës shumemërore të Partisë Drejtësi Integrim dhe Unitet në Qarkun Elbasan, për plotësimin e vakancës së njoftuar nga Kuvendi i Shqipërisë”.
KQZ vendosi t’i japë mandatin e deputetit të Kuvendit të Shqipërisë, kandidatit të radhës së listës shumemërore të subjektit “Partia Drejtësi, Integrim dhe Unitet”, Qarku Elbasan, zj. Elena Xhina.
Në intervista të mëparshme Elena Xhina ka thënë se modeli i saj në politikë është ish- kryeministrja britanike, Margaret Thaçer, e cila ka venë në kornizë figurën e femrës si njerëzore, por duke mos anashkaluar vlerat femërore. Duke e ngritur në pediestal figurën e femrës, e cila dinte të ishte dhe e vendosur dhe e hekurt, por njëkohësisht dhe e butë dhe femërore.
Kush është Elena Xhina për të gjithë ata që nuk e njohin?
Elena Xhina ka përfunduar studimet për drejtësi në Elbasan. Për 10 vjet ka ushtruar profesionin e avokates. Aktualisht është nënkryetare e Këshillit të Qarkut, prej 2 vitesh, dhe prej 4 vitesh punon si pedagoge e jashtme në universitetin “Aleksandër Xhuvani”. Elena Xhina ka fituar titullin doktore shkencash në vitin 2016.
