Artan Grubi ka reaguar pas lajmeve se Ali Ahmeti mund të jep dorëheqje nga pozita e kryetarit të BDI-së.
Ai ka sqaruar se Ahmeti nuk do të japë dorëheqjen, duke theksuar se ai mbetet i pazëvendësueshëm për BDI. Sipas Grubit, lideri i BDI-së është thirrur nga Haga vetëm në cilësinë e dëshmitarit.
Deklarata e plotë:
Në lajmin e publikuar për intervistimin e Kryetarit Ahmeti nga Haga dhe gjoja dorëheqjen e tij nga BDI nuk ka asgjë të vërtetë. Intervistimi i z. Ahmeti zgjat vetëm dy ditë dhe është në cilësinë e dëshmitarit, ndërsa do të realizohet në Prishtinë në javën e parë të shtatorit. Sa i përket tërheqjes, e përsëris, Ali Ahmeti është i pazëvendësueshëm për BDI-në dhe për shqiptarët, jo vetëm në Maqedoninë e veriut, por edhe në rajon dhe ai është kontribues kyç në stabilitetin, sigurinë dhe orientimin euroatlantik të rajonit.
