Të dhënat e vetëdeklaruara nga shefja e Krimeve të Rënda, Donika Prela, në formularët e pasurisë, tregojnë se ajo nuk justifikon me burime të ligjshme blerjen e një apartamenti në Durrës.
Në vitin 2007, Donika Prela dhe bashkëshorti i saj kanë nënshkruar një kontratë porosie për një apartament 2+1 në qytetin e Durrësit, me vlerë 32.100 euro. Sipas të dhënave të deklaruara në formularët e mëvonshëm, të publikuar në “Opendata.al”, rezulton se çifti Prela ka kryer pagesën e plotë në momentin që ka nënshkruar kontratën e porosisë, pra në vitin 2007.
Duke parë të dhënat e deklaruara nga prokurorja Prela prej formularit të parë, dorëzuar në vitin 2003, deri në formularin për pasuritë deri në fund të vitit 2007, konstatohet se, rreth 10 mijë euro të përdorura për blerjen e këtij apartamenti nuk kanë burim të ligjshëm financiar.
Donika dhe Vangjel Prela kanë nisur jetën e tyre bashkëshortore me të ardhura modeste, duke jetuar në një shtëpi me qera. Donika Prela u emërua prokurore në vitin 2002, në përfundim të shkollës së Magjistraturës, ndërsa bashkëshorti i saj punonte si inxhinjer ndërtimi në një kompani private, me të ardhura pranë mesatares, sipas formularit të deklarimit.
Deri në fund të vitit 2006, çifti Prela kishte arritur të blinte një makinë 250 mijë lekë, si edhe të kursente 1 milion lekë të reja, të cilat i mbanin cash në shtëpi. Në maj të vitit 2007, Donika dhe Vangjel Prela nënshkruajnë kontratën e porosisë dhe paguajnë 32 mijë euro për apartamentin 2+1.
Burimi financiar për blerjen e këtij apartamenti rezulton shuma e depozituar në bankë, si edhe 15 mijë euro hua, të marra pa asnjë dokument noterial apo deklaratë nga vëllai i Vangjel Prelës.
“Boldnews.al” konsultoi kursin e këmbimit të monedhës euro me lek sipas Bankës së Shqipërisë, për vitin 2007. Rezultoi se 1 euro shkëmbehej me 125 lekë. Pra, Donika dhe Vangjel Prela kishin në Bankë rreth 8 mijë euro (konvertimi i 1 milion lekëve).
Praktikisht, çifti Prela kishte në dispozicion për blerjen e apartamentit 8 mijë euro në bankë dhe 15 mijë euro, të marra hua pa asnjë dokument, në total 23 mijë euro. Por, sipas deklaratës së pasurisë, ata kanë porositur dhe paguar plotësisht çmimin e një apartament me vlerë 32 mijë euro.
Bazuar në llogaritë e thjeshta, rezulton se Donika Prela nuk justifikon të paktën 9 mijë euro për pagesën e apartamentit. Në asnjë nga deklarimet e mëvonshme të prokurores Prela nuk justifikohet mungesa prej 9 mijë eurosh për këtë transaksion financiar, duke krijuar dyshime të forta se kjo shumë përbëhet nga të ardhura të paligjshme.
Donika Prela, e cila prej muajit Maj 2018 drejton Prokurorinë për Krime të Rënda, rezulton me dyshime të shumta në deklaratën e pasurisë. “Boldnews.al” ka raportuar më parë edhe për dy transaksione jashtë logjikës ekonimike.
Donika Prela, në Shkurt 2014, ka blerë një apartament tjetër në Durrës, me vlerë 1.4 milionë lekë, çmim disa herë më i ulët se sa vlera e tregut. Këtë apartament e ka shitur pas 10 muajsh, me një çmim tre herë më të lartë, 4 milion lekë, duke arkëtuar rreth 3 milion lekë brenda një kohe shumë të shkurtër.
Gjithashtu, Donika dhe Vangjel Prela kanë blerë një tokë 1000 m2 në Petrelë të Tiranës, me çmim 350 mijë lekë ose 350 lekë për metër katror. Ky çmim i deklaruar nga çifti Prela është të paktën 10 herë më i ulët se sa çmimet e referencës dhe 20 herë më i ulët se sa çmimet e tregut në atë zonë.
Donika Prela aktualisht është nën procesin e verifikim nga Komisioni i Pavarur i Kualifikimit, në kuadër të ligjit të Vetingut. Deri në fund të vitit 2017, ajo ishte prokurore në Durrës. Pas zgjedhjes së mikeshës së saj, Arta Marku, në postin e Kryeprokurores së Përkohshme, karriera e Prelës mori një ngritje të menjëhershme.
Fillimisht, Prela u caktua, në kundërshtim me ligjin, në postin e drejtueses së Prokurorisë së Durrësit. Pas 5 muajsh, në Maj 2018, po në kundërshtim me ligjin, ajo u caktua si drejtuese e Prokurorisë për Krime të Rënda, detyrë që ende vijon ta kryejë./Boldnews/
