Shqipëria e Irlanda ishin dy vendet e para që u shprehën të gatshme për të pranuar disa nga emigrantët e anijes së rojes bregdetare italiane “Diciottti”, e cila për disa ditë rresht lundroi në ujërat e detit Mesdhe në pritje të një porti për t’u zbarkuar.
Sot u zbulua dhe dokumenti qeverisë italiane mbi procedurën e transferimit të 20 emigrantëve afrikanë të anijes “Diciotti” nga Italia në Shqipëri.
Por vendimi për trasferimin e emigrantëve afrikanë në Shqipëri u përcoll me jo pak debate politike në Itali.
Ekspertët e së drejtës së emigracionit e konsiderojnë shkelje të Kushtetutës italiane e të traktateve ndërkombëtare të të drejtave të njeriut, ndërsa Komisioni Europian ka paralajmëruar Italinë se transferimi i emigrantëve në në një vend jo anëtar të BE siç është Shqipëria, mund të bëhet vetëm nëse respektohet vullneti i tyre i lirë.
Po kur do të gjejë zbatim procesi i transferimit të 20 emigrantëve afrikanë në Shqipëri?
Sipas dokumentit, Ministria e Brendshme italiane ka prezantuar në komisionin e ligjeve të Parlamentit italian draftin mbi këtë çështje.
Nënsekretari i shtetit në Ministrinë e Brendshme, Luigi Gaetti, në këtë dokument thekson se sipas referimit të Ambasadës italiane në Tiranë, organizimi i transferimit të 20 emigrantëve afrikanë në Shqipëri i është besuar zëvëndës/ministres së Brendshme shqiptare Rovena Voda, e cila në koordinim me Organizatën Botërore të Emigrantëve UNHCR janë duke përgatitur masat parësore për strehimin e tyre.
Italia përmes Ministrisë së Brendshme dhe të Jashtme si dhe organizatave ndërkombëtare po bisedojnë me autoritetet shqiptare për të përcaktuar bazën e normativës ndërkombëtare mbi të cilën do të gjejë zbatim transferimi i emigrantëve në Shqipëri.
Baza ligjore për transferimin në një shtet jo pjesë të BE
Në dokument Italia duket se ka gjetur dhe bazën ligjore për trasferimin.
“Shqipëria aderon në Konventën e Gjenevës, është anëtare e Këshillit të Europës e ka ratifikuar disa konventa ndërkombëtare për mbrojtjen e të drejtave njerëzore” ka deklaruar në Komsionin e Ligjeve, Luigi Gaetti.
Sipas tij, “Shqipëria prej vitit 2014 është zyrtarisht vend kandidat për t’u pranuar në procesin e anëtarësimit në Bashkimin Europian, respekton kriteret e Kopenhagenit në garantimin e demokracisë, shtetit të së drejtës, të drejtat e njeriut dhe mbrojtjen e pakicave etnike”.
Sipas funksionarit të Minsitrisë së Brendshme italiane, Shqipëria është përcaktuar “si një vend i sigurt” nga 8 vende anëtare të Bashkimit Europian, madje Komisioni Europian, ka propozuar që Shqipëria të përfshihet në një listë të mundshme për të ashtuquajturit “vende të treta të sigurta”.
Gjithashtu për Ministrinë e Brendshme Italiane, Shqipëria ka zhvilluar në vite një sistem të përshtatshëm strehimi për emigrantët e rrugës ballkanike që kërkojnë azil.
Përzgjedhja e 20 emigrantëve që do të vinë në Shqipëri
Në dokument thuhet se në transferimin e emigrantëve do të merret parasysh ruajtja e bërthamave familjare mes anëtarëve të së njëjtës familje, respektimi i kategorive në rrezik si dhe marrja në mbrojtje e emigrantëve minorenë të pashoqëruar.
Ndërkohë në Itali 100 emigrantë nga anija “Diciotti” janë marrë në mbrojtje nga Kisha katolike italiane e cila po i shërben në dioqeza të ndryshme në të gjithë territorin.
20 emigrantët afrikanë që priten të transferohen në Shqipëri ndodhen aktualisht në qëndrën hot spot të emigrantëve në Messina./Oranews/
Dokumenti i Ministrisë italiane për transferimin e emigrantëve në Shqipëri by Tirana Today on Scribd
