Dokumentari mbi jetën e futbollistit të ndjerë Emiliano Sala ka ndezur mjaft polemika me të vërtetat drithëruese që ka nxjerrë në dritë.
Në dokumentarin e nxjerrë nga gazeta prestigjioze franceze “L’Equipe”, ndër të tjera është publikuar gjithashtu një bisedë mes Sala dhe një miku të tij. Bëhet fjalë për një bisedë në Whatsapp, e regjistruar më datë 6 Janar, vetëm pak ditë para aksidentit tragjik.
“Duan të më shesin. Sot ka ardhur oferta e Cardiff. Kanë negociuar për të fituar sa më shumë dhe duan të largohem me çdo kusht. Është e vërtetë që më ofrojnë një kontratë të mirë, por në nivelin e projekteve sportive nuk është interesante për mua”, dëgjohet Sala, teksa i ankohet mikut të tij.
https://www.youtube.com/watch?v=ahRmjuHkR7Y
Nëse Nante do të kishte pyetur Emiliano Sala përpara se ta shiste te Cardiff, atëherë vdekja tragjike e futbollistit do të ishte evituar. Ky është konkluzioni në të cilin kanë dalë fansat pas publikimit të dokumentarit, të cilët kanë shpërthyer në polemika.
Nga biseda e sulmuesit argjentinas del edhe një detaj tjetër, që ka ndezur një protestë të ashpër të tifozëve kundër pronarëve të klubit.
Sala nxjerr edhe emrin e Frank Kita, drejtorit sportiv dhe në të njëjtën kohë i biri i presidentit të skuadrës franceze.
“Nuk dua të flas personalisht me Kita. Nuk më pëlqen si njeri. I ofruan më shumë para dhe do të më shesë. As që më pyeti. Askujt nuk i intereson se çfarë dua unë. I interesojnë vetëm paratë”, – dëgjohet në dokumentin audio të publikuar nga “L’Equipe”.
Sulmuesi argjentinas humbi jetën pas një aksidenti ajror në ngushticën e Le Mans.
