Një 43-vjeçar është arrestuar nga uniformat blu, pasi ka goditur me grushte punonjësin e policisë H.M. Në pranga ka përfunduar Gazment Nezëraj, i dënuar më parë për heqje të paligjshme të lirisë dhe ndërtim pa leje.
Mësohet se 43-vjeçari ishte përfshirë në një sherr me persona të tjerë, ndërkohë që për veprat penale të lartpërmendura ishte dënuar me shërbim prove. Në momentin që polici shkoi për ta shoqëruar, Nazëraj iu kundërpërgjigj duke e qëlluar me grushte.
Njoftimi i policisë:
Ushtroi dhunë ndaj punonjësit të policisë, arrestohet në flagrancë autori.
Procedohet në gjendje të lirë një shtetas tjetër për veprën penale “Kundërshtim ndaj punonjësve të policisë”
Nga Specialistët e Seksionit për Krimet u bë arrestimi në flagrancë i shtetasit:
G.N, 43 vjeç, banues në lagjen “Donika Kastrioti”, Berat, (i dënuar më parë për veprat penale “Heqje e paligjshme e lirisë” dhe “Ndërtim pa leje”),
Arrestimi i tij u bë pasi në lagjen Uznovë, pēr shkak të detyrës ka goditur me grushte punonjësin e policisë H.M.
Gjithashtu u referuan materialet në Prokurorinë pranë Gjykatës së Shkallës së Parë Berat, për shtetasin A.K, 48 vjeç, banues në lagjen “Uznovë”, Berat pasi kundërshtoi punonjësin e policisë të lartpërmenduar.
Materialet i kaluan Prokurorisë së Rrethit Gjyqësor Berat për veprën penale ”Goditje për shkak të detyrës”, për shtetasin G.N dhe “Kundështim ndaj punonjësve të policisë”, për shtetasin A.K.
