Policia e Sarandës ka dhënë detaje lidhur me djegien e tre makinave në Sarandë, në fshatin Shëndëlli të Konispolit.
Kështu, policia ka hedhur poshtë pretendimin e komisionarit të LSI-së, teksa njofton se automjetet janë në pronësi të 3 pronarëve të ndryshëm, ndërsa nuk ka të dhëna për autorët e dyshuar.
NJOFTIMI I POLICISË:
Sipas të dhënave zyrtare, rreth orës 03:13, në fshatin Shëndëlli, Konispol, është marrë njoftimi se janë përfshirë nga flakët 3 automjetet e mëposhtme:
- Automjeti tip “Volksëagen” me targë AA 193 NR, në pronësi të shtetasit N.L.
- Automjeti tip “Benz”, me targë AA 394 IR, në pronësi të shtetasit D.L. (David Luca)
- Automjeti tip “Citroen” me targë NHK 9114, në pronësi të shtetasit V.M.
Si pasojë e flakëve, mjeti i parë është djegur plotësisht, ndërsa dy mjetet e tjera janë dëmtuar pjesërisht.
Menjëherë shërbimet e policisë kanë mbërritur në vendngjarje në orën 03:45 dhe nga këqyrja që i është bërë vendit të ngjarjes, nuk janë gjetur mbetje apo prova të ndonjë lënde djegëse. Grupi hetimor po punon për dokumentonim e plotë në lidhje me sqarimin e rrethanave të ngjarjes.
Nga ana tjetër komisioneri i LSI-së, David Luca tha se kjo ngjarje ka ndodhur për arsye politike, për shkak të detyrës që ka marrë.
