Të tjera detaje kanë dalë lidhur me ngjarjen e rëndë regjistruar sot në aksin rrugor Elbasan-Peqin, ku Andi Zylyfi humbi jetën, ndërsa miku i tij, Ardit Uruçi mbeti i plagosur.
Mësohet se dy të rinjtë kanë qenë duke pirë kafe në një lokal në fshatin Përparim dhe, në momentin që kanë dalë janë qëlluar me breshëri nga një automjet tip BMW X5.
Po ashtu, “Top Channel” bën me dije se 23-vjeçari i ka kushërinj viktimat e atentatit të 29 dhjetorit të vitit të shkuar; ku mbetën të vrarë Endrit Alibej, 34 vjeç, Arben Dylgjeri 56 vjeç nga Elbasani, si dhe një shtetas turk Erdal Duranay.
Policia po heton në disa pista. Dyshohet se atentati ka ndodhur për larje hesapesh mes bandash. Po ashtu, 23-vjeçari është djali i një ish-punonjësi të sigurisë në burgun e Peqinit, dhe një prej pistave ku po hetohet është ajo që lidhet me punën e Hysni Zylyfit, babait të viktimës.
Deri më tani, në polici janë shoqëruar 13 persona si dëshmitarë okularë.
