Djali i Arjan Salës ka marrë statusin “Fëmijë në përkujdesje të Republikës”. Aroni, djali 5-vjeçar i Arjan Salës, heroit që humbi jetën thuajse një vit më parë nga flakët për të shpëtuar kolegët e tij, është marrë nën përkujdesjen e shtetit. Në ceremoninë e zhvilluar sot në Kryeministri, kreu i qeverisë Edi Rama vlerësoi edhe njëherë aktin dhe shembullin dinjitoz që Arjan Sala ka dhënë, ndërsa humbi jetën e tij.
“Rreziku më i madh që i kanoset çdo kujt në fakt, por sidomos një qeverie është që të jetojë me bindjen se i di të gjitha. Janë edhe ngjarjet, shembuj, nxitje që vijnë nga kontakti intensiv me shoqërinë dhe e pasurojnë dhe çojnë përpara programin e një qeverie.
Një amanet të dëgjuar pa na u thënë të gjithë këta prindër që nuk jetojnë më. Një amanet të thënë pa fjalë Arjan Sala në shtëpinë tij kur ai mungonte. Ishte e pranishme nusja e re dhe i ati, bashkë me familjarët e tjerë. Ne i japim Aronit një mbështetje për 20 vitet e ardhshme me një mirënjohje të madhe, jo vetëm për gjestin e të atit, por edhe nxitjen që i ati u bë që ne të jemi këtu sot”, u shpreh kryeministri.
Trupi i pajetë i Arjan Salës u nxor nga magazina e “Casa Italias”, 3 ditë më vonë pasi u përfshi nga flakët më 24 mars 2021. Në momentin e rënies së zjarrit, në magazinë kanë qenë më shumë se 20 punonjës të cilët kanë arritur të shpëtojnë, përveç kolegut të tyre që i ndihmoi, Arjan Salës.
Kryeministri Edi Rama i akordoi sot 11 fëmijëve të parë statusin “Fëmijë në përkujdesje të Republikës”. Kreu i qeverisë pasi shprehu mirënjohjen e thellë për prindërit e tyre që dhanë jetën për mbrojtjen e jetës së të tjerëve, tha se statusi nuk është më një zotim, por një risi e veçantë e jetës sonë.
“Ende më shumë duhet bërë dhe ja ku jemi sot në një rast tipik në rastin e dhënies së mbështetjes për fëmijët e heronjve, dëshmorëve, e prindërve të vetëmohuar për një qëllim të lartë. Të cilët mbase duhet ta kishin marrë kohë më parë këtë mbështetje, dhe e marrin në fillim të mandatit të tretë.
Jo për t’u justifikuar, por për të nënvizuar faktin… dua ta mbyll duke thënë dy gjëra. Së pari qeverisja është një proces nëpërmjet të cilit ne mësojmë çdo ditë, kuptojmë çdo ditë e më thellë dhe ndjejmë çdo ditë e më shumë pulsin e shoqërisë duke u përpjekur që çdo ditë të përmirësohemi dhe të bëjmë edhe më mirë. Së dyti, përtej dëshirave tona qëndron gjithmonë muri i pamundësisë të cilin duhet ta shtyjmë çdo ditë me shumë durim dhe me shumë forcë që të zgjerojmë hapësirën e mundësive. Hapësira e mundësive zgjerohet me shumë përpjekje, me shumë durim. Zgjerohet duke punuar pa u lodhur, zgjerohet duke mësuar çdo ditë dhe duke u përpjekur që të vemë në jetë çdo ditë një mësim të ri”, tha Rama.
