Kryeprokurorja Arta Marku ka zhvilluar takime intensive ditën e sotme. Ajo ka pritur në zyrën e saj kreun e Shërbimit Informativ Shtetëror, Helidon Bendo.
Ky i fundit mbërriti në zyrën e Markut rreth orës 13:00, me të cilën bisedoi për disa minuta në zyrën e saj, pa praninë e medieve.
Ndonëse arsyeja e këtij takimi mbetet sekrete, kjo mund të konsiderohet si dalja e parë në publik e Bendos.
Po ashtu, Marku priti në zyrë pak para Bendos ambasadoren gjermane të akredituar në Tiranë, Susanne Schütz.
Njoftimi i Prokurorisë së Përgjithshme për takimin me Susanne Schütz:
Prokurori i Përgjithshëm, znj. Arta Marku, takon ambasadoren e Gjermanisë, znj. Susanne Schütz
Prokurori i Përgjithshëm, znj. Arta Marku priti në një takim Ambasadoren e Republikës Federale të Gjermanisë, znj. Susanne Schütz.
Në takimin e zhvilluar ditën e sotme (e Enjte, dt. 28.12.2017), diplomatja gjermane shprehu mbështetjen e vendit të saj për institucionin e Prokurorisë së Përgjithshme, si edhe vullnetin për forcimin e mëtejshëm të bashkëpunimit dy-palësh në fushën e sigurisë dhe të ndjekjes penale.
Zonja Marku shprehu vlerësimin për ndihmesën e madhe që kanë ofruar autoritetet gjermane për Prokurorinë Shqiptare, si në aspektin logjistik, ashtu edhe në koordinimin për hetime të përbashkëta.
Prokurori i Përgjithshëm garantoi ambasadoren Schütz se do të intensifikohet aktiviteti institucional në luftën kundër korrupsionit dhe trafiqeve të paligjshme, si edhe do të forcohet më tej bashkëpunimi vendas dhe ndërkombëtar në luftën kundër korrupsionit dhe trafiqeve të paligjshme.
