Presidenti Ilir Meta ka vizituar sot Beratin në Ditën Kombëtare të Trashëgimisë Kulturore. Meta vlerësoi qytetin mijëravjeçar, si vendin që i kthen sytë e gjithë botës nga Shqipëria.
“Berati do të jetë gjithmonë një nga qendrat më të bukura e tërheqëse e në vëmendjen mijëravjeçare të qytetërimit tonë që prej shumë kohës vazhdon të tërheq imagjinatën tonë kombëtare dhe të mbarë botës, përfshi edhe UNESCO.
Sot të gjithë popujt e Evropës, për koincidencë me Ditën tonë të Kulturës Kombëtare, festojnë njëkohësisht edhe Ditën e Trashëgimisë Evropiane.
Ne shqiptarët ndihemi krenar përpara historisë së kulturës evropiane, pasi historia dhe trashëgimia shqiptare është pjesë dinjitoze e kulturës evropiane”, tha Meta.
Ndër të tjera, presidenti Meta theksoi se në këtë udhëtim shumë shekullor ne jemi krenarë për autenticitetin, gjuhën dhe traditat tona, ashtu sikurse ndihemi të vetëdijshëm dhe për kulturën, identitetin tonë perëndimor dhe harmonizimin e tyre me ndikimin e kulturave të tjera përreth.
