8 Dhjetori i 2022-shit shënon 32 vite nga krijimi i Lëvizjes Studentore të Dhjetorit të vitit 1990. “Dita e Rinisë” në Shqipëri është festë kombëtare, në nder të të gjithë studentëve të Dhjetorit 1990.
Kjo ditë është historike, pasi që nga data 8 deri në datën 12 të vitit 1990, kjo lëvizje solli pluralizmin politik.
Dhjetori i 1990-s mbetet një nga momentet më të rëndësishme të historisë së Shqipërisë, që solli ndryshimin. Ishte një moment transformimesh të mëdha, dhe një sërë faktorësh filluan të lëvizin.
Më 8 Dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.
Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.
Prej vitit 2009, me vendim të marrë nga Kuvendi i Shqipërisë, kjo datë përkujtohet si festë kombëtare në nderim të të gjithë studentëve të Dhjetorit 1990 dhe gjithë rinisë shqiptare.
