Dramatike ka qenë humbja që ka pësuar Skënderbeu në Bernë, përballë Young Boys me rezultatin 2-1. Një ndeshje mjaft e mirë e korçarëve të cilët kaluan në avantazh të parët, por që u përmbysën në sekondat e fundit. Kjo bë që Skënderbeu ta mbyllë me humbje aventurën e tij në Europa League këtë sezon dhe në vendin e katërt në grup me pesë pikë. U ndje shumë mungesa e një sulmues, pasi raste kishte pa fund për korçarët, por mungoi një pikë referimi në sulm.
Pjesa e parë ishte në nivele të larta dhe ë shumë raste nga te dyja ekipit, kishte një dominim të dukshëm nga Skënderbeu por prapë ajo u mbyll me rezultatin e bardhë pa gola. Ndërsa në të dytën Skënderbeu reagoi shumë shpejt, pasi në minutën e 51’, Gavazaj përfiton mjaft mirë në zonën e kundërshtarëve dhe dërgon topin në rrjetë. Një gol që ka ngritur në këmbë të gjithë tifozët që ishin në stadium. Kishte një mbështetje mjaft të madhe, pasi në atë zonë të Zvicrës jetojnë shumë shqiptarë.
Por vetëm katër minuta ka zgjatur gëzimi, pasi Hoarau ka realizuar një gol mjaft të bukur me kokë për të sjellë baraspeshën. Gol që duket sikur i rëndoi shumë psikologjikisht korçarët, pasi niveli i tyre i lojës ra disi pas golit.
U ndje edhe lodhja e kalendarit të ngjeshur dhe në minutat e fundit djemtë e Ilir Dajës u dukën të kënaqur edhe me një barazim, pasi po provonin të vononin lojën në disa mënyra. Por kjo vonesë bëri që të ndëshkoheshin kur koha e rregullt dhe shtesa kishte përfunduar, pasi gjyqtari lejon lojën të vazhdojë pas vonesës që shkakton Nimaga. Zviceranët fitojnë një goditje këndi dhe me topin e ngelur në zonë, përfiton Assale duke e dërguar në rrjetë.
Një humbje plotësisht e pamerituar për Skënderbeun pas asaj që dha në fushën e lojës. Në këtë mënyrë përfundon edhe aventura e korçarëve në Eurapoa League.
