Gjashtë mjete janë shkrumbuar në një servis në fshatin Leshnicë, Pogradec. Nga të dhënat e para dyshohet se zjarrvënia është e qëllimshme. Servisi ‘Mercedes 2006’, është në pronësi të Geri Pengut, ndërsa makinat jepeshin me qira. Nuk raportohet për dëme në njerëz, ndërsa grupi hetimor po punon për identifikimin dhe kapjen e autorëve.
Dëmi nga zjarrvënia përllogaritet deri në 60 mijë euro. Burimet bëjnë të ditur se nga kamerat janë parë persona të afrohen, dhe të kenë hedhur benzinë mbi mjetet duke u vendosur zjarrin. Policia dyshon se zjarri mund të jetë vënë nga dy persona.
Sakaq, pronari nuk është emër i panjohur për uniformat blu. Ai rezulton të jetë i përfshirë në fushën e trafikimit të narkotikëve. Në vitin 2008 ai është arrestuar për aksident me pasojë vdekjen e një 70-vjeçari. Ndërsa në vitin 2014, Pengu është proceduar për një aksident me plagosje.
“Më datë 25.03.2022, rreth orës 04:00, jemi njoftuar se në fshatin Leshnicë, Pogradec, në rrethimin e jashtëm të servisit në pronësi të shtetasit G. P., ka rënë zjarr dhe për pasojë janë djegur 6 automjete të cilat jepeshin me qira. Dëme në njerëz nuk ka, por vetëm dëme materiale. Nga të dhënat e para, dyshohet se zjarrvënia mund të ketë qenë e qëllimshme. Grupi hetimor po punon për sqarimin e plotë të rrethanave të ngjarjes, identifikimin dhe kapjen e autorëve”, njofton policia.
