Shumë njerëz iu nënshtruan, apo u bënë palë me diktaturën komuniste. Por ka pasur edhe nga ata që guxuan t’ia përplasin në fytyrë Enver Hoxhës krimet që po kryente ndaj popullit të tij, edhe pse duke e paguar këtë me kokën e tyre.
Më 16 Janar 1948, pushkatohet dibrani Edip Tërshana. Pak ditë më herët, ai kishte pasur kurajon t’i dërgonte një letër personale udhëheqësit komunist.
Duke i kujtuar se kishte qenë themelues i Lëvizjes Nacional Çlirimtare në krahinën e tij, Tërshana, thotë se komunistët po sillen me popullin me keq se çdo pushtues, duke e sharrë, poshtëruar, rrëmbyer pronën, dhe në fund duke i marrë edhe jetën pa asnjë proces të rregullt gjyqësor: “Sot organizatorët sllave, janë ata që drejtojnë punët shtetnore dhe para-shtetnore. Kjo është tradhti. Jam kundra për vrasjet me gjyq dhe pa gjyq, që i bëhen këtij populli, pse kështu don sllavi. Për 20000-30000 shqiptarë që dergjen në burg, se s’janë “komunista” sllavë. Kjo është tradhti. Ky është pushteti, që varfënoi tregun shqiptar për të vesh klyshët e Rusisë, dhe e la popullin byth-lakuriq. Jam kundra këtij pushteti, se është spekulator tue e grabit popullin me ligj, dhe mallin e sekuestruar nga tregëtarët po ja shet ma shtrejt se ç’e kishin ata. Duke e akuzuar Hoxhën se po i shërben drejtpërsëdrejti imperializimit sllav, Tërshana thekson se komunistët kanë futur frymën e përçarjen kombëtare. “Ky pushtet futi përçarjen toskë e gegë, katolikë e ortodoksë, myslimanë e ortodoksë, pra tradhëti e naltë. More të mjerë, ju ka verbu fanatizma e ideologjisë, dhe nuk shifni faktin që po i bëni popullit varrin?”- shkruante ai.
Përgatiti Tirana Today
