Edhe pse Bashkimi Evropian po kontribuon në dialogun Kosovë-Serbi, duket se kjo nuk është e mjaftueshme, teksa pala kosovare kërkon përfshirjen e SHBA-ve, si një garanci më e madhe.
Para pak ditësh, kryeministri i Kosovës Ramush Haradinaj u shpreh se nuk do të ketë bisedime me Serbinë pa përfshirjen e SHBA-së në dialogun që po zhvillohet mes dy vendeve në Bruksel.
“Nuk mund të vazhdojmë dialog nëse nuk është Amerika në tavolinë”, deklaroi Haradinaj.
“Roli amerikan është i nevojshëm për paqen. Ne rolin e Amerikës në tavolinë e shohim si nevojë thelbësore. Bisedimet do të duhej të kishin përfunduar me njohje reciproke të shtetësisë mes Kosovës dhe Serbisë”, shtoi kryeministri i Kosovës.
Por, Zyra e BE-së nuk ka dhënë një sinjal të qartë nëse SHBA do të përfshihet në këtë dialog.
“Të dyja palët kanë rënë dakord të fillojnë punën në dialogun e lehtësuar nga BE-ja për normalizimin e marrëdhënieve midis Beogradit dhe Prishtinës. Përfaqësuesja e lartë, Federica Mogherini, ka rikonfirmuar kohët e fundit se dialogu ka hyrë në një fazë të re”, shkruhet në përgjigjen e Zyrës së BE-së.
Propozimin e kryeministrit Haradinaj për përfshirjen e SHBA-së në dialog e kishte përkrahur edhe presidenti i vendit Hashim Thaçi, i cili këtë gjë e konsideronte si të domosdoshme.
