Kreu i “Bindjes Demokratike”, Astrit Patozi ka reaguar lidhur me etiketimin e demokratëve si “dhuratë e Ramës” pajisjen me zyra të partisë që ai udhëheq.
Me vendim qeverie të firmosur nga zv.kryeministri Erion Braçe, Bindjes Demokratike i është caktuar vendosja e selisë pranë ish-Vilave Gjermane në kryeqytet. Ndërsa i është ofruar e drejta për të përdorur edhe palestrën që ka në krah të vilës nr.1.
Në reagimin e Patozit thuhet se pajisja me zyra e një force politike është një detyrim ligjor i qeverisë.
“Pa as më të voglën dëshirë, por në respekt të publikut, që bombardohet pa mëshirë me marrëzi politike dhe me fake news, jo vetëm në rastin tërmeteve, sqarojmë si më poshtë:
1-Pajisja me seli në Tiranë e BINDJES DEMOKRATIKE është një detyrim ligjor i qeverisë së Republikës së Shqipërisë, i cili buron nga ligji “Për partitë politike”. Që do të thotë se mospajisja do të kishte qenë shkelje flagrante e këtij ligji”, shkruan Patozi.
Nga ana tjetër, ai shpreh pakënaqësi sa i përket ambienteve dhe vendndodhjes së selisë.
“I vetmi “nder” që na ka bërë qeveria e Edi Ramës është se na ka dhënë një ambjent, që nuk na pëlqen fare, në një zonë gjithashtu të papërshtatshme të periferisë së kryeqytetit, dhe për më tepër me disa muaj vonesë, që nga momenti kur na kishte lindur e drejta, sipas ligjit.
Por për këtë gjë ne, as nuk jemi ankuar dhe, as e kemi bërë çështje, sepse kemi menduar se Shqipëria ka shumë halle të tjera më të rëndësishme, se sa sistemimi me zyra pune i një partie politike”, shprehet kreu i BD-së.
Po ashtu, Patozi ka përcjell edhe një mesazh drejtuar demokratëve, të cilët i quan “morrakë” dhe “idiotë” të Lulzim Bashës.
“Në rast se do të ndiqnim logjikën e idjotëve të Lulit, që e paskan trajtuar si një “dhuratë” të Edi Ramës, ne duhet të konsideronim të tillë edhe çdo fond nga buxheti i shtetit, që merr Partia Demokratike apo çdo forcë tjetër politike, sipas ligjit.
2-Meqë marrokët e Lulit po thonë se ky është një privilegj i qeverisë për BINDJEN DEMOKRATIKE, ne ftojmë çdo subjekt politik, që shkon me mendjen e tyre dhe që ka një seli në Tiranë, të vijë e t’i ndërrojmë kokë për kokë zyrat, duke filluar nga nesër, po të duan.
3-Ambjentet e punës së BINDJES DEMOKRATIKE, do të vijojnë të mbeten pronë shtetërore edhe pasi ne të vendosemi atje. Ato, as i marrim dot me vete në shtëpi, dhe as kemi ndërmend që të ndërtojmë ndonjë pallat të paligjshëm, të cilin edhe po na e prishën, mund të na e dëmshpërblejë pastaj qeveria me miliona euro.
Ndaj i ftojmë idjotĕt e Lulit të mos mërziten kot, sepse aty i kanë, dhe mund të na i marrin prapë, gjithmonë, nëse do t’u vijë ndonjëherë në këtë jetë rasti, që ta kenë ata në dorë”, shtoi ai.
