Nga MPB bëhet e ditur se Prokuroria e Shkupit deri në këtë moment nuk ka urdhëruar burgim për asnjë person, lidhur me dhunën në Kuvend.
8 personat që u ndaluan nga policia gjatë trazirave tani janë të lirë.
“Numri i personave të privuar nga liria, veprimet konkrete të organeve hetuese, si dhe veprimet e mëtejshme që do të ndërmerren, Prokuroria do t’i bëjë publike për opinionin, kur të krijohen kushte për atë dhe pasi prokurorët publikë kompetentë do të përfundojnë me konstatimin fillestar të fakteve”, – bëhet me dije në deklaratën e Prokurorisë së Shkupit.
Zyrtarisht nga Gjykata Penale thuhet se Prokuroria Publike nuk ka kërkuar as paraburgim ose konfiskim të dokumenteve të udhëtimit për to.
Burime anonime të Prokurorisë Publike informojnë se i tërë rasti do të regjistrohet si “pjesëmarrje në turmë”, që është vepër penale, por për këtë ka dënim shumë më të vogël, sesa nëse rasti regjistrohet si tentativë për vrasje. Zyrtarisht Prokuroria thotë se e gjithë kjo është spekulim edhe se akoma nuk është përcaktuar se për çfarë vepre penale do të ngarkohen protestuesit.
Vendimi final do të merret pasi të mblidhet materiali i duhur dëshmues, veçmas për secilin person të përfshirë, thuhet në kumtesë.
LSDM-ja ka deklaruar se asnjë deputet i rrahur nuk është thirrur për të dhënë dëshmi si viktimë e dhunës.
