Një video e cila u bë virale tregonte një femër që dhunonte një këmbësor kur ai kalonte tek vijat e bardha. Në videon e publikuar ditën e djeshme, drejtuesja e mjetit jo vetëm që nuk i dha përparësi zotërisë që po kalonte vijat e bardha, por edhe shihet duke e dhunuar. Policia ka shoqëruar një shofere 46-vjeçare e cila është filmuar të martën duke dhunuar një këmbësor në vijat e bardha.
Pas publikimit të pamjeve filmike, u lokalizua automjeti dhe ka shoqëruar shtetasen me inicialet B. R., 46 vjeçe. Në vijim të veprimeve u bllokua automjeti tip “Benz”, ndërsa për drejtuesen e automjetit u vendos masa administrative, për mosdhënie përparësie këmbësorëve.
Reagim i Drejtorisë Vendore të Policisë Tiranë
Në lidhje me një video të postuar në portale, në të cilën shfaqet një shtetase që ka ndaluar automjetin në vija të bardha dhe nuk respekton rregullat e qarkullimit rrugor (mosdhënie përparësie këmbësorëve), ju sqarojmë se: Shërbimet e Policisë, menjëherë pas publikimit të pamjeve filmike, organizuan punën për identifikimin e drejtueses së automjetit që shfaqet në video.
Specialistët e Qarkullimit Rrugor kanë lokalizuar automjetin dhe kanë shoqëruar drejtuesen e tij, shtetases B. R., 46 vjeçe. Në vijim të veprimeve u bë bllokimi i automjetit tip “Benz”, ndërsa për drejtuesen e automjetit u vendos masa administrative, në bazë të Kodit Rrugor, për mosdhënie përparësie këmbësorëve.
Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie, në Komisariatin Dixhital dhe në numrin 112, duke iu garantuar anonimat të plotë dhe reagim të menjëhershëm e të paanshëm.
