Djali i politikanit serb në Kosovë, Nenad Rashiç, raportohet se është rrahur teksa po dilte nga shkolla në Llapnasellë të Graçanicës.
Sipas Kallxo, Nikolla Rashiç, është sulmuar nga 30 persona, të cilët thuhet se kanë pasur me vete edhe mjete të forta. Nenad Rashiç, në një intervistë ka treguar se djali i tij është sulmuar me boksa të hekurt e çekiç.
Ndërkohë, deri më tani 8 persona të cilët dyshohen se kanë qenë të përfshirë në rrahjen e djalit të politikanit serb të Kosovës, Nenad Rashiq, janë shoqëruar në Polici. Këtë e ka konfirmuar zëdhënësi i Policisë së Kosovës për rajonin e Prishtinës, Agron Borovci.
“Me të marrë informatën njësitet e nevojshme policore kanë dalë në vendin e ngjarjes. Bazuar në informacionet e para dyshohet se një person i gjinisë mashkullore, ka pësuar lëndime dhe i njëjti është dërguar për trajtim mjekësor. Lidhur me këtë rast policia ka shoqëruar në stacion policor 8 persona të dyshuar (prej tyre një i mitur)”, ka bërë të ditur Borovci.
Borovci ka shtuar se Policia e Kosovës aktualisht po vazhdon punën për zbardhjen e plotë të rastit. Nikolla Rashiç ka pësuar dëmtime të rënda në fytyrë dhe në kokë, ku sipas babait të tij i janë thyer dhe dhëmbët.
