Derbi i Manchesterit padyshim ishte një ndër ndeshjet më të bukura që është zhvilluar këtë sezon në Premier League. United i Mourinhos arriti të bënte një përmbysje të madhe, ku nga 2-0 arriti ta mbyllte ndeshjen në 2-3. Por ndeshja është ndezur shumë më parë se të fillonte, pasi tifozët e Cityt dhe të United janë përleshur mes tyre pak metra larg hyrjes për në stadium.
Rreth 50 tifozë janë përfshirë në përleshje fizike, teksa nuk kanë munguar as sendet e forta, tymueset dhe mjetet e tjera piroteknike të hedhura mes tyre. Ndërhyrja e policisë bëri që tifozët të shpërndaheshin në drejtime të ndryshme. Disa prej tyre u arrestuan dhe u mbajtën në kontroll nga policia.
Një dëshmitar deklaroi: “Ishte gjithçka e qetë, por për 1 minutë u grumbulluan shumë tifozë kundërshtarë dhe nisën përleshjet mes tyre. Po i shikoja nga dritarja. Shkatërruan çdo gjë që iu doli para”.
