Në përballjen mes Partizanit dhe Flamurtarit të zhvilluar një natë më parë në “Selman Stërmasi” u shënua një incident i shëmtuar. Ishin tifozët e Partizanit që sulmuan fotografin e vlonjatëve pasi Andi Ribaj kishte shënuar golin e barazimit të përkohshëm në pjesën e parë.
Federata Shqiptare e Futbolli ka reaguar për këtë incident, duke dënuar dhunën e ushtruar ndaj zyrtarit të klubit Flamurtari, duke e konsideruar një ngjarje që nuk ka aspak lidhje me futbollin dhe frymën “Fair Play” që duhet të përcjellin të gjithë.
Pikërisht në prag të derbit kryeqytetas, ku edhe dihet ndjeshmëria që ka në kryeqytet kjo ndeshje, FSHF i ka bërë thirrje klubeve që të punojnë sa më shumë me tifozeritë që ngjarje të tilla të mos përsëriten më. Në pamjet filmike është parë qartë se si tifozët e Partizanit kanë kaluar rrethimin e fushës, duke kryer një agresion të vërtetë ndaj fotografit, që është munduar të mbrohet, ndërsa në ndihmë i kanë ardhur lojtarët e të kuqve Trashi e portieri Hoxha. Në këtë këndvështrim, Federata ka insistuar, duke bërë thirrje ndaj organeve ligjzbatuese, që të vendosin përpara ligjit agresorët të cilët janë evidentuar nga pamjet filmike.
Tifozet e Partizanit ne fushe on Vidnews.
Në komunikatën për shtyp të FSHF është bërë e ditur se zyrtari i Klubit Flamurtari ka dorëzuar kallëzim penal mbi ngjarjen, ndërsa institucioni që drejton futbollin është në kontakte të vazhdueshme me autoritetet përkatëse dhe klubet për ti dhënë një zgjidhje përfundimtare këtij problemi, që dëmton dhe cenon imazhin e futbollit shqiptar.
DEKLARATË PËR SHTYP E FSHF
Federata Shqiptare e Futbollit dënon me ashpërsi dhunën e ushtruar ndaj zyrtarit të klubit Flamurtari gjatë ndeshjes Partizani – Flamurtari të zhvilluar mbrëmjen e djeshme në stadiumin “Selman Stërmasi”. Një ngjarje e tillë nuk ka aspak lidhje me lojën e futbollit dhe frymën “Fair Play” që duhet të përcjellin të gjithë. I bëjmë thirrje klubeve që të punojnë sa më shumë me tifozeritë dhe stafet e tyre që ngjarje të tilla të mos përsëriten më.
Në të njëjtën kohë i bëjmë thirrje organeve ligjzbatuese, Policisë së Shtetit dhe Prokurorisë që të vendosin përpara ligjit agresorët të cilët janë evidentuar nga pamjet filmike. FSHF dhe zyrtari i Klubit Flamurtari kanë dorëzuar kallzimin penal, tani është koha që Policia të veprojë. Situata dhe ngjarje të tilla nuk duhet të përsëriten më në stadiumet shqiptare.
FSHF do të qëndrojë në kontakte të vazhdueshme me autoritetet përkatëse të rendit dhe me klubet për ti dhënë një zgjidhje përfundimtare këtij problemi, që dëmton dhe cënon imazhin e futbollit shqiptar.
