Policia ka kryer disa shoqërime në polici të disa tifozëve të Partizanit në prag të ndeshjes që u zhvillua me Teutën fundjavën që lamë pas. Një ndër të shoqëruarit ka qenë pikërisht dhëndri i trajnerit Sulejman Starova, Gent Malaj. Ky i fundit pretendon se është arrestuar dhe dhunuar nga forcat e rendit gjatë shoqërimit, gjithashtu pretendon se është shoqëruar pa të drejtë në komisariat, por policia ka një version tjetër.
Ndërsa sipas policisë Gent Malaj dhe katër persona të tjerë ishin pjesëmarrës në trazirat që ndodhën ditën e shtunë para ndeshjes së basketbollit Partizani-Tirana. Për këtë arsye ata janë shoqëruar në komisariat dhe janë proceduar penalisht. Po ashtu deklarata e policisë sqaron se gjatë shoqërimit nuk është ushtruar asnjë lloj dhune ndaj Malajt dhe se është ndaluar një ditë pas incidentit sipas procedurës standarde.
Dhëndri i Starovës – Një ndër viktimat e dhunës policore ka qenë edhe Gent Malaj, dhëndri i trajnerit të Partizanit, Sulejman Starova. Ai është paraqitur pranë stadiumit dhe, kur ka marrë vesh se biletat mund të bliheshin vetëm me kartë identiteti ose me tjetër dokument identifikimi, është nisur drejt makinës së tij për të marrë kartën e identitetit. Në atë moment, policët i kanë vendosur një kapuç në kokë dhe e kanë dhunuar barbarisht pa i dhënë ndonjë arsye.
Nuk dihet ende nëse ka qenë një keqkuptim i policisë dhe Malaj është ngatërruar me ndonjë tjetër, por ai ka përfunduar në rajon i shoqëruar. Menjëherë pas ngjarjes mësohet se Malaj ka marrë raportin mjekësor dhe po përgatit padinë për dhunën policore.
Duke qenë se është i pajisur edhe me pasaportë italiane, dhëndri i Starovës ka njoftuar edhe ambasadën e shtetit fqinj për dhunën që ka pësuar, duke pretenduar se ka qenë sulm i padrejtë dhe pa asnjë shkak. Ai ka kërkuar videot nga televizionet që janë gjendur aty afër në atë moment, me qëllim që të argumentojë se policia e ka keqtrajtuar pa asnjë shkak.
Ja deklarata e plotë e Policisë:
“Në lidhje me pretendimin e shtetasit G.M se në datën 10.12.2017 në stadiumin “Selman Stermasi” përpara zhvillimit të ndeshjes Partizani- Teuta, është ushtruar dhunë ndaj tij nga punonjësit e policisë dhe më pas është shoqeruar ne ambjentet e Komisariatit te Policise Nr.2, sqarojmë se:
As ndaj këtij shtetasi e as ndaj asnjë të shoqëruari nga policia nuk është ushtruar aspak dhunë, por shoqërimi i tij dhe shtetasëve të tjerë u bë pasi ishin të dyshuar për vepren penale prishjen e qetësinë publike në datën 09.12.2017 para zhvillimit të ndeshjes së basketbollit në pallatin e sportit “Asllan Rusi”, ku janë kryer procedurat standarde nga ana e policisë dhe janë proceduar në gjedje të lirë për veprën penale “Prishja e qetësisë publike”.
Për të siguruar rendin dhe qetesinë publike nga shërbimet e policisë përpara fillimit të ndeshjes janë kërkuar kartat e identifikimit dhe janë kryer kontrolle për mbajtjen e sendeve të paligjshme dhe të palejushme në stadium.
Shtetasi G.M dhe të tjerët që u proceduan penalisht, të dyshuar si personat që prishën qetësinë publike në pallatin e sportit “Asllan Rusi” më datën 09.12.2017.
Më datën 10.12.2017, në vijim të ngjarjes së ndodhur më datën 09.12.2017, në pallatin e sportit “Asllan Rusi”, ku gjatë zhvillimit të ndeshjes së basketbollit është prishur qetësia publike, filloi Procedimi Penal në gjendje të lirë, për veprën penale “Prishja e qetësisë publike”, e parashikuar nga Neni 274 i Kodit Penal, në ngarkim të shtetasve:
A.H, 25 vjeç, lindur Tiranë dhe banues në Tiranë,
J.Sh, 19 vjeç, lindur Tiranë dhe banues në Tiranë,
E.G, 18 vjeç, lindur Tiranë dhe banues në Tiranë,
E.C, 30 vjeç, lindur Tiranë dhe banues në Tiranë,
G.M, 33 vjeç, lindur Vlorë dhe banues në Tiranë.
Shtetasi G.M dhe gjithë personat e tjerë të shoqëruar, në përfundim të procedurave të para hetimore janë lënë të lirë ku dhe kanë firmosur nē librin e shoqërimit pa shprehur asnjë pretendim për dhunë a shkelje të tjera gjatë procedurave të shoqërimit.
