Me anë të rrjeteve sociale, studentët kanë paralajmëruar se protesta do të vijojë edhe sot, me të njëjtën intesitet si të ditëve më parë. Pra, dhjetori i dytë vazhdon.
Lëvizja për Universitet bën thirrje që politika të qëndrojë larg studentëve.
“Studentët në protestë para Ministrisë së Arsimit, po përballen me një fushatë të koordinuar dezinformimi dhe orvatjesh për t’i përçarë. Lëvizja për Universitetin u bën thirrje të gjitha partive politike, që të ndalin veprimet përçarëse ndaj studentëve.
Edhe më fort se nga ne, thirrja për mospërfshirjen e partive vjen nga mijëra studentë njëzëri. Janë ata që e kanë kuptuar se partitë kanë vetëm një interes: përçarjen e studentëve dhe instrumentalizimin e protestës për agjendat e tyre”.
Studentët kanë publikuar agjendën sipas së cilës të gjithë studentët do të mblidhen nëpër fakultetet e tyre nga ora 8:30 deri në orën 9:30, dhe më pas do të nisin marshimin për të qenë në orën 10:00 përpara Ministrisë së Arsimit.
Ata përsëritin qëndrimin e tyre, jo negociata, por vetëm plotësim të kushteve.
Sot pritet që të protestojnë edhe studentët e Universitetit “Eqerem Çabej” në Gjirokastër.
