Nisur nga fakti se dhimbja e kokës prej tensionit është një nga dhimbjet e kokës primare më të hasura, mjeku Petrit Drini ka shpjeguar disa nga shkaqet dhe simptomat që e bëjnë këtë sëmundje kaq të shpeshtë. Rreth 80% e personave e kanë vuajtur të paktën një herë. Meqenëse simptomat nuk janë aq të rënda sa në rastin e Migrenës, kjo dhimbje koke konsiderohet si problem vetëm në rastin kur behet e shpeshtë ose kronike.
Shkaqet e dhimbjes së kokës nga tensioni:
- Stresi zakonisht shkaktohet pasdite pas orëve të gjata stresuese të punës ose pas ndonjë provimi
- Gjendje ankthi
- Mungesa e gjumit
- Lodhja
- Qëndrimet e parehatshme, pozicione të vështira dhe/ose jo korrekte
- Ngrënia në mënyrë të çrregullt (uria)
- Mungesa e kafeinës
- Dehidratimi
- Kërcitja/shtrëngimi i dhëmbëve
- Drita e fortë
- Zhurmat e larta
Simptomat e dhimbjes së kokës prej tensionit:
Dhimbjet e kokës të shpeshta nga tensioni merren në konsideratë kur personi ka patur të paktën 10 dhimbje koke gjatë një muaji. Ka shkallë të ndryshme të frekuencës ose të asaj që konsiderohet kronike.
Personat që vuajnë nga dhimbja kronike e kokës prej tensionit, raportojnë që të kenë patur dhimbje më shumë se 180 ditë në një vit. Kjo dhimbje koke shfaqet kryesisht nga të dyja anët, dhe ka një natyrë shtrënguese ose ushtruese presioni. Nëse është e lehtë, nuk ndikon apo pengon në kryerjen e punës.
Këta persona mund të shfaqin simptoma të shoqëruara me Migrenë të tilla si nauze/të përziera dhe ndjeshmëri e lartë ndaj dritës ose zhurmave, por zakonisht vetëm njërën prej këtyre simptomave, shkruan Shendeti online.
Simptomat më të zakonshme të dhimbjes së kokës prej tensionit përfshijnë:
- Tension në muskujt përreth kokës dhe qafës
- Presion të vazhdueshëm në kokë, më shpesh mbrapa syve
- Dhimbje në bazë të kafkës
- Marramendje në raste të rralla
