Nga ana e uniformave blu është identifikuar shqiptari i cili u vra një ditë më parë nga policia greke. Policia e Shtetit bën me dije se shtetasi i vrarë është 39-vjeçari Altin Mulla, i cili u ekzekutua gjatë një shkëmbimi zjarri nga policia greke.
Rrethanat e vrasjes janë ende të paqarta, ndërsa mediat greke raportojnë se disa shqiptarë po transportonin drogë, dhe kanë shkëmbyer zjarr me policinë.
Nga të shtënat me armë zjarri, ka mbetur i plagosur lehtë në dorë edhe një polic grek. Mediat e vendit fqinj shkruajnë se shqiptarët e tjerë kanë braktisur çantat me kanabis, dhe janë larguar. Policia greke vijon operacionin për kapjen e tyre.
“Ditën e djeshme, Policia e Shtetit u informua nga policia greke për vrasjen e një shtetasi shqiptar. Sipas informacionit të policisë greke, shtetasi A.M., 39-vjeç, humbi jetën gjatë një shkëmbimi zjarri.
Policia e Shtetit është në proces të vazhdueshëm shkëmbimi informacioni me policinë greke, për këtë çështje. Ndërkohë që Ministria për Evropën dhe Punët e Jashtme, po kryen hapat e nevojshme me autoritetet homologe greke, Policia e Shtetit siguron qytetarët dhe familjarët e viktimës se do të ndiqen të gjitha hapat, në kuadër të bashkëpunimit diplomatik dhe policor dypalësh, për sqarimin e situatës dhe të rrethanave ku humbi jetën shtetasi shqiptar”, bëjnë me dije burime zyrtare të policisë.
