21-vjeçari Redmond Gruda, i cili i mori jetën gjyshes së tij, nuk është një personazh i panjohur për policinë në Durrës, pasi ai është person me precedentë të mëparshëm penalë. Mësohet se Redmond Gruda është dënuar edhe dy herë të tjera për plagosje, herën e parë kur ishte vetëm 11-vjeç. Prokurori tha se Gruda ka pranuar se është autori i vrasjes së gjyshes se tij 81-vjeçare, Floresha Gruda, dhe ka prova të mjaftueshme që e vertetojnë ketë, duke kërkuar “arrest me burg”.
Pasi dëgjoi palët, gjyqtarja e çështjes, Eda Kaja, e cilësoi arrestimin e ligjshëm, duke i dhënë masën e sigurimit personal “arrest me burg”. Në Gjykatën e Durrësit ai ka thënë se nuk donte që ta vriste gjyshen e tij, por situata i kishte dalë nga kontrolli. “Nuk doja ta vrisja gjyshen, më doli situata nga kontrolli”.
Ai ka qëlluar mbi 13 herë me thikë gjyshen, duke e lënë të vdekur në vend. Ngjarja e rëndë ndodhi mesditën e së enjtes, në lagjen Nr. 16 të qytetit të Durrësit, për motive të dobëta.
I riu braktiset nga familjarët
Familjarët, të afërmit dhe shokët e tij e kanë braktisur. Askush nuk u paraqit në seancën ku trupa gjykuese do të vlerësonte masën e sigurisë. Me atlete sportive dhe duar të lidhura pas shpine, ai pranoi autorësinë e krimit. I riu shprehu pendesë, por nuk dha shpjegime rreth motivit që e shtyu drejt këtij akti të rëndë. Në momentin që gjyqtarja Eda Kaja e pyeti se përse e vrau gjyshen, 21- vjeçari heshti dhe uli kokën.
