Gazetari Trazhgim Sokolaj ka hedhur dritë lidhur me detajet e reja sa i takon vetëdorëzimit të Klement Balilit. I ftuar në studion e emisionit “Arena”, ai tha se “Eskobari i Ballkanit”, e ka kaluar natën e parë në qeli, në ambientet e Drejtorisë së Policisë së Tiranës, në një ambient që quhet “Dhoma e Izolimit VIP”. Ai tha më tej se ky është një ambient ku më parë janë mbajtur ish-deputetët Arben Ndoka, Arben Çuko, ish-guvernatori i Bankës së Shqipërisë.
“Klement Balili e ka kaluar natën e parë në qeli, në ambientet e Drejtorisë së Policisë së Tiranës, në një ambient që quhet “Dhoma e Izolimit VIP”.
Është një ambient në katin e dytë të Drejtorisë së Policisë së Tiranës, janë dy dhoma që janë përdorur tradicionalisht nga policia, për të mbajtur një kategori personash që kanë patur funksione publike në momentin që janë arrestuar, për të mos i vendosur në ambiente të përbashkëta me shtetas të arrestuar për vepra penale, për krime ordinere. Ky është një ambient ku më parë janë mbajtur ish-deputetët Arben Ndoka dhe Arben Çuko, ish-guvernatori i Bankës së Shqipërisë.
Procedura është e tillë, që pas vetëdorëzimit, ka 72 orë afat procedurial për të dalë para gjykatës. Deri në momentin që Gjykata e Krimeve të Rënda do të marrë një vendim për masën e sigurisë ndaj Klement Balilit, ai do mbahet në ambientet e policisë. Ditën e nesërme, personi i arrestuar transferohet në Gjykatën e Krimeve të Rënda, ku do të ketë një seancë paraprake për caktimin e masës së sigurisë ndaj tij.
Në fakt masa është caktuar në mungesë, është “arrest me burg” në mungesë. Në bazë të procedurave të reja, Klement Balilit do ti merren për herë të parë deklarime në seancën gjyqësore. Do të pyetet për qëndrimin e tij ndaj akuzës, dhe nëse ka prova apo dokumenta që do ti dorëzojë për shqyrtim në gjykatë.
Ka një grup avokatësh. Klement Balili përfaqësohet nga ish-Prokurori i Përgjithshëm Theodhori Sollaku, prej një viti avokat dhe nga një avokat tjetër i njohur në Tiranë, Baftjar Rusi”.