Detaje të reja zbulohen nga grabitja që ndodhi dy ditë më parë në Ksamil të Sarandës, ku u dhunua 23-vjeçari Petro Lula.
Ky i fundit u zu në befasi brenda vilës katër katëshe pranë plazhit “Pema e Thatë”, pronë e familjes së tij, e cila prej shumë vitesh punon e jeton në Greqi.
Në katin e dytë të vilës mund të shihje qartë shenjat e përleshjes, në dhomën e gjumit kishte njolla gjaku, portofoli bashkë me një kartë identiteti ishin të hedhura përtokë, pasi autorët kishin mundur të merrnin gjithë të hollat.
Lula ndodhej i vetëm në banesën 4-katëshe të familjes së tij, kur tre persona të maskuar hynë nga dera e pasme e vilës.
Studenti i Anglishtes është zgjuar nga gjumi në momentin që ka dëgjuar lëvizje të dyshimta dhe ka nisur të kontrollojë shtëpinë, ndërsa autorët i ka pikasur në shkallët e katin e dytë të vilës. I zënë në befasi, nuk ka mundur të bëjë dot asgjë për vetëmbrojtje pasi është rrahur keqas e goditur me hekurin e pistoletës që mbante një prej grabitësve deri në gjakosje.
Tre autorët e kanë lidhur 23-vjeçarin Lula duke bastisur ç’të mundnin prej saj, raporton BalkanËeb. Në fund, kur kanë dalë në oborrin e vilës, kanë marrë çelësat e saj si dhe makinën tip “Benz”, me targa AA 322 DP.
I riu nuk ka mundur të bëjë dot asgjë për t’i ndaluar, pasi ka mundur të lirohet disa orë pasi autorët ishin larguar.
Policia e Sarandës ka nisur hetimet për ngjarjen dhe ka shoqëruar 10 persona deri tani.
