Detaje të reja janë hedhur në ditë lidhur me ekzekutimin e 34-vjeçarit Eri Zefi, i cili u gjet i vdekur një ditë më parë në një kanal në fshatin Zall të Mirditës. Personi që shihni në foto është viktima Zefi, që njihej edhe me një emër të dytë si Anton Zefi.
34-vjeçari është marrë peng, dhe është ekzekutuar në Rrugën e Kombit. Më pas trupin e kanë marrë dhe e kanë hedhur në kanal. Dje, në orën 16:15, 34-vjeçari është gjetur i vdekur në një kanal, në fshatin Zall-Xhuxhë të Mirditës.
Pistat ku po hetohet
Pista e parë ku po hetohet është ajo e hakmarrjes, pasi vëllai i viktimës Eri Zefi, Ndue Zefi, vrau mëngjesin e 24 shkurtit në qytetin e Durrësit, fqinjin e tij, Martin Ndreca, pasi ky i fundit i kishte ofenduar njerëzit e familjes. Ndërkohë burime nga policia bëjnë me dije se janë shoqëruar disa persona për t’u marrë në pyetje, në lidhje me ngjarjen.
Viktima u gjet nga një banor i zonës
Ka qenë një banor i zonës, i cili ka pikasur trupin e viktimës dhe menjëherë ka njoftuar policinë. Ai është qëlluar me një plumb me kokë, dhe dyshohet se ka gjetur menjëherë vdekjen. Dyshimet e policisë janë se ai mund të jetë vrarë gjatë natës së kaluar, ndërsa ende nuk dihet nëse është ekzekutuar në vendin ku është gjetur apo mund të jetë sjellë i vrarë aty. Vendi ku u gjet viktima është zonë e pabanuar, ç’ka vështirëson punën e grupit hetimor për të zbardhur dinamiken e krimit.
Vrasësit janë profesionistë
Në vendin e ngjarjes nuk është gjetur asnjë gëzhojë apo provë tjetër materiale, ç’ka hedh dyshime se autorët mund të kenë qenë vrasës profesionistë.
I vëllai ka vrarë fqinjin e tij në shkurt të këtij viti
Viktima Eri Zefi rezulton të jetë vëllai i Ndue Zefit, i cili në muajin shkurt të këtij viti ka vrarë fqinjin e tij, 45-vjeçarin Martin Ndreca, ngjarje e ndodhur në qytetin e Durrësit. Krimi ndodhi pas një sherri në lokal, në sy të djalit 10-vjeçar të Martin Ndrecës.
Pak ditë pas krimit të kryer, Ndue Zefi u vetëdorëzua në Policinë e Shkodrës dhe vijon të qëndrojë në paraburgim, në pritje të dënimit që do t’i japë Gjykata e Durrësit. Dy familjet Ndreca dhe Zefi ishin nga Mirdita, dhe prej vitesh ishin zhvendosur me banim në qytetin e Durrësit.
Hetimet e Policisë janë përqendruar pikërisht te hasmëria mes dy familjeve, por nuk përjashtohet mundësia që 34-vjeçari të ketë pasur ndonjë konflikt tjetër, ç’ka ka çuar në ekzekutimin e tij me armë zjarri.
