Banorët e fshatit Vagalat në Bashkinë e Memaliajt janë zgjuar të tronditur ditën e martë. Skënder Hoxha, babai i katër fëmijëve, goditi Antoneta Hoxhën me sëpatë në kokë, duke e lënë të vdekur në vend. Bashkëshorti i saj e ka goditur në pjesën e ballit, dhe në krahun e majtë. Ngjarja dyshohet se ka ardhur si pasojë e një sherri në familje, motivet e të cilit ende nuk dihen.
Autori i krimit i ka telefonuar kryeplakut të fshatit rreth orës 04:00, për t’i thënë se ishte vrarë bashkëshortja e tij. Kryeplaku, bashkë me gruan e tij, kanë parë trupin e 53-vjeçares Antoneta Hoxha të mbuluar në gjak, dhe të shpërfytyruar.
“Mos e prekni, se e kanë vrarë”, këto kanë qenë fjalët e 63-vjeçarit, kur ata kanë tentuar të mësojnë se çfarë kishte ndodhur. 63-vjeçari, pas shumë orësh që është marrë në pyetje nga hetuesit, ka pranuar se gjithçka ishte një krim në familje.
Çifti jetonte në kushte të mira financiare, dhe përjashtohet fakti se konflikti mund të ketë ardhur për shkak të varfërisë. Nisur nga rrethanat e ngjarjes, dyshohet se 63-vjeçari mund ta ketë kryer vrasjen e bashkëshortes së tij për shkak të shfaqjes së problemeve të para mendore, apo psikologjike.
