Zbulohen të tjera detaje lidhur me ngjarjen makabre, ku një 53-vjeçar i mori jetën ish-gruas së tij, gjyqtares Fildes Hafizi.
Fadil Kasemi, autor i krimit, kishte pritur Hafizin të dilte nga parukeria dhe sapo e ka parë atë të hipte në makinë, i është afruar me qetësi tek xhami. E frikësuar, 39-vjeçarja ka nxituar të ndezë makinën dhe të largohet, por Kasemi ka vepruar shpejt. Gjakftohtë, është afruar te xhami dhe e ka qëlluar me dy plumba pistolete, njëri prej të cilëve e kapi në kokë, sapo hipi në makinën e saj.
“Mos më merr në qafë”, kishte bërtitur gruaja para se ish-i shoqi ta vriste.
Pas krimit makabër, Kasemi është larguar menjëherë nga vendi i ngjarjes me një furgon mallrash. Sipas hetuesve të çështjes, 53-vjeçari i ka vënë pistoletën në kokë drejtuesit të mjetit dhe e ka urdhëruar ta çojë në periferi të Tiranës.
Në atë moment, shoferi ka lëvizur me automjetin e tij dhe sapo ka hasur patrullën e policisë, ka zbritur dhe u ka thënë bluve: “Kapeni personin që kam në makinë, mund të jetë vrasësi”.
Pas kësaj, oficerët e policisë kanë bërë shoqërimin e tij, ku rezultoi të ishte autori i vrasjes së rëndë. Me vete iu gjet edhe arma e krimit. 53-vjeçarit i është bërë edhe testi i alkoolit, i cili ka rezultuar 0.045%.
Gjithashtu, policia po bën verifikimet për të parë nëse në telefonin e të ndjerës ka pasur mesazhe apo biseda kërcënuese nga ish-burri. Ndërkaq, policia dyshon se viktima ka marrë kërcënime të vazhdueshme edhe gjatë kohës që ish-bashkëshorti ka qenë në qeli. Në pyetje pritet të merren edhe familjarët e të ndjerës, kurse pyetja e dy fëmijëve të saj do të bëhet në prani të psikologes.
Ndërkohë, burimet e mësipërme pohuan për BalkanËeb se kanë qenë 4 persona që kishin parë skenën e ngjarjes. Ata janë shoqëruar në polici për të dëshmuar dhe për t’u pyetur nëse ndonjëri prej tyre kishte mundur ta njihte autorin.
Policia e Tiranës duket se do ta kishte të vështirë identifikimin e autorit që qëlloi për vdekje gruan 39-vjeçare, pasi edhe pse zona ku ndodhi ngjarja është tejet e mbipopulluar, asnjë prej bizneseve aty pranë nuk kishin kamera sigurie. Sipas tyre, ngjarja do të kishte qenë e vështirë për t’u zbardhur në kohë rekord, nëse autori nuk do të tentonte që të largohej me një mjet që gjendej rastësisht i parkuar në vendin e ngjarjes.
