Prokuroria paraqiti në seancën me dyer të mbyllura të Këshillit të Mandateve një tjetër provë, që cilësohet si prova më e fortë dhe që është pikërisht dëshmia e një oficereje policie në Vlorë kundër Saimir Tahirit.
Oficerja ka pranuar të bashkëpunojë duke dhënë dëshminë e saj para Prokurorisë kundër Saimir Tahirit. Thuhet se oficerja ka pasur njohje me Moisi Habilajn, trafikantin që përmend në bisedat e tij ish-ministrin.
Frika më e madhe e Prokurorisë në rast se ish-ministri i Brendshëm nuk arrestohet me autorizimin e Kuvendit është pikërisht intimidimi i saj.
Pas përgjimeve në bisedat e anëtarëve të grupit Prokuroria e Krimeve të Rënda ka mësuar se kjo oficere ka qenë mike e kreut të grupit kriminal, Moisi Habilaj.
Oficerja ka treguar miqësinë që ka patur me Moisi Habiljan, duke shtuar se ky i fundit i ka thënë se është kushëri i Saimir Tahirit, ish-ministrit të Brendshëm.
Sipas saj, Moisi Habilaj i ka pohuar oficeres gjatë një bisede në një kafene në Vlorë se ka siguri për punën që bën, pasi pasi ishte kushëri i Tahirit.
Madje, Habilaj i kishte premtuar se do ndërhynte për ta ngritur në gradë dhe për ta emëruar në një pozicion më të mirë pune në polici.
Oficerja ishte kthyer në informatore të Habilajve dhe ka kërkuar garantimin e mbrojtjes fizike dhe jetës së familjarëve të saj.
Shkak për këtë lëvizje të saj, duket se ka qenë frika e arrestimit nga policia, duke pranuar të rrëfejë gjithçka di rreth lëvizjeve të grupit që drejtohej me Habilaj.
