Motra e Konstandin Kaçifas ka folur për mediat greke, duke hedhur akuza ndaj sjelljes së policisë shqiptare. Ajo ka përcjellë të dhëna tronditëse, duke vënë në dukje se familja është terrorizuar pas ngjarjes. Gjatë intervistës, motra e të ndjerit ka thënë se komandot janë treguar të ashpër, dhe se i kanë vënë armën në kokë prindërve.
“Komandot erdhën në shtëpi. Mamaja ishte duke qarë për vdekjen e vëllait. Por ata nuk patën mëshirë, dhe ia vunë armën tek koka duke i thënë se “nuk jemi në Greqi, por në Shqipëri”. Një gjë e tillë ndodhi edhe me babanë. Ishte një skenë e tmerrshme. Kjo ishte e papranueshme, një vepër kriminale. E tillë ishte edhe skena kur hanin para mamasë çfarë gjenin në shtëpi”.
4 ekspertë të Institutit të Mjekësisë Ligjore janë përfshirë në ekspertizën që po zhvillohet për vrasjen e Konstandinos Kaçifas, 35 vjeç. Por, ndërkohë ekspertët janë në pritje edhe të pyetjeve dhe rezervave të familjarëve të viktimës.
Në raport-shërbim thuhet se Kaçifa ka qëlluar me armën automatik përgjatë dy orëve operacion, duke rrezikuar jetën e oficerëve. Dhe gjatë shkëmbimit me armë zjarri, ai është qëlluar nga policia nga një distancë e konsiderueshme.
