Në kuadër të një operacioni intensiv mes Belgjikës, Gjermanisë dhe Mbretërisë së Bashkuar, kanë përfunduar në pranga 15 shtetas shqiptarë, pasi akuzohen për trafikim dhe kontrabandim të qenieve njerëzore drejt Anglisë.
Ata u arrestuan në një hotel që shërbente si vendqëndrim i klandestinëve, teksa u zbuluan edhe 37 shtetas të tjerë që prisnin të kalonin kufirin anglez.
Transporti kryhej me anë të automobilave të modifikuar për të mbajtur fshehur disa persona, ose nëpërmjet kamionëve në marrëveshje me shoferë të huaj.
Kreu i trafikut raportohet të jetë një shtetas shqiptar i moshës 29 vjeç, identiteti i të cilit nuk bëhet i njohur.
12 prej autorëve u arrestuan në Belgjikë, ndërsa dy të tjerë në Mbretërinë e Bashkuar dhe i fundit në Gjermani. Sakaq, 3 prej të dyshuarve pritet të ekstradohen në Belgjikë për t’u përballur me drejtësinë, ndërkohë nga 12 personat e arrestuar ditët e fundit, 5 prej tyre janë paraburgosur dhe 7 të tjerë janë liruar me kusht.
