Një ngarkesë prej 217 kg marijuanë u sekuestrua në zonën e Leçes në Itali gjatë një operacioni të përbashkët mes policisë shqiptare dhe policisë italiane.
Tvklan.al ka mësuar se dyshimet e para nisën nga dy shqiptarë në portin e Vlorës, të cilët po udhëtonin drejt Italisë me traget. Policia Kufitare e Vlorës dyshoi se dy personat ishin të përfshirë në aktivitet të dyshimtë dhe njoftuan homologët italianë.
Pasi mbërritën në Itali, u mbajtën në vëzhgim për rreth dy ditë deri sa u takuan me dy shqiptarët e tjerë me iniciale B.K. dhe A.D. të arrestuar tashmë në shtetin fqinj. Të katërt shqiptarët e dyshuar po mbaheshin nën vëzhgim, deri sa dy të arrestuarit u zbuluan se kishin fshehur 217 kg kanabis në një shkurre pranë banesës së tyre. Ata u arrestuan në flagrancë nga karabinierët, ndërsa sasia e lëndës narkotike u sekuestrua.
Nga hetimet rezulton se shqiptarët aktivitetin e drogës e zhvillonin në shtetin italian. Burime bëjnë me dije për tvklan.al se kanabisi nuk ishte trafikuar nga Shqipëria, por kishte hyrë në Itali nga Maroku. Autoritetet italiane në bashkëpunim me palën shqiptare janë duke vijuar hetimet për të zbuluar persona të tjerë të përfshirë në këtë veprimtari kriminale.
Njoftimi i policisë
Vijojnë operacionet e përbashkëta mes Policisë së Shtetit dhe Policisë Italiane. Një operacion i përbashkët mes Policisë Kufitare dhe forcave Policore Italiane ka sjellë në kapjen dhe sekuestrimin e një sasie prej 217 kg lënde narkotike e llojit marjuanë në zonën e Leçes. Janë arrestuar në flagrancë për posedim të lëndës narkotike dy shtetas shqiptarë me banim në Itali.
Falë bashkëpunimit të ngushtë dhe në kohë reale ka nisur një veprimtari policore e mirëfilltë me shkëmbim informacionesh për persona të dyshuar për veprimtari të trafikut të paligjshëm të cilët operojnë në shtetin italian.
Bazuar në informacionet e dërguara në rrugë operative nga Policia Kufitare Shqiptare nëpërmjet zyrës ndërlidhëse të Policisë Shqiptare në Itali, policisë italianë (shërbimit antidrogë, Policisë së Kufirit të Zonës 9 dhe Guardia di Finanza të Pulias), u bë i mundur arrestimi i shtetasve me iniciale B. K. 37 vjeç dhe A.D. 26 vjeç , të cilët ishin në përgatitje të trafikimit të lëndës narkotike në zonën e Leçes, Itali.
Janë në vijim veprimtaritë policore dhe hetimore për kapjen e bashkëpunëtorëve të tjerë të tyre. Kjo veprimtari dëshmon se bashkëpunimi dhe koordinimi me forcat policore italiane nuk kufizohet vetëm në goditjen e trafikut në det, por edhe në brendësi të territorit qoftë ky në Shqipëri apo në Itali.
