Referuar ekzekutimit të 34-vjeçarit pak ditëve më parë në Mirditë, Prokuroria ka ngritur dyshime për dy persona. Nga të dhënat e grumbulluara është konstatuar se Eri Zefi, është ndjekur për disa ditë me radhë. Ekzekutorët kanë shfrytëzuar momentin kur ai është larguar për vizitë te dajat e tij, për ta marrë peng dhe më pas ekzekutuar. Burime nga grupi hetimor që po punojnë për zbardhjen e vrasjes së Eri Zefit, bëjnë me dije se i riu është ndjekur nga dy persona për disa ditë me radhë, para se të ekzekutohej.
34-vjeçari Eri Zefi u gjet i ekzekutuar me armë zjarri në Zall Xhuxhë të Njësisë Administrative të Fanit në Mirditë, rreth orës 16:00 të së mërkurës, në një zonë të pyllëzuar 50 metra larg Rrugës së Kombit. Ka qenë një banor i zonës, i cili ka pikasur trupin e viktimës dhe menjëherë ka njoftuar policinë në lidhje me ngjarjen.
Dyshimet e policisë janë se ai mund të jetë vrarë disa orë përpara në një vend tjetër, dhe më pas është hedhur nga autorët në vendin ku u gjet trupi i pajetë. Vendi ku u gjet viktima është zonë e pabanuar, ç’ka vështirëson punën e grupit hetimor për të zbardhur dinamiken e krimit. Në vendin e ngjarjes nuk është gjetur asnjë gëzhojë apo provë tjetër materiale, ç’ka hedh dyshime se autorët mund të kenë qenë vrasës profesionistë.
Pista e gjakmarrjes
Pas marrjes në pyetje të disa personave që mund të kishin dijeni mbi ngjarjen, Prokuroria ka ngritur dyshimin për vrasje për gjakmarrje, ndërsa pista është përqendruar te dy personat, edhe pse akuza ende nuk ka dhënë indicie për emrat e tyre.
Sekuestrohen kamerat e sigurisë
Grupi hetimor ka sekuestruar disa kamera sigurie në zonat ku ka frekuentuar 34-vjeçari javën e fundit, me qëllimin për të pikasur ndonjë person të dyshuar.
Dëshmia e familjarëve
Familjarët kanë deklaruar në polici se Zefi ishte nisur për të shkuar te dajat e tij në zonën e Fanit, kur ka ndodhur ngjarja. Ekzekutorët kanë shfrytëzuar këtë moment, dhe e kanë marrë peng e më pas e kanë ekzekutuar 34-vjeçarin në fshatin Zall Xhuxhë, në një zonë të pyllëzuar 50 metra larg Rrugës së Kombit.
