Duket se ka dështuar tentativa e parë në BE për hapjen e negociatave me Shqipërinë, ndërsa ministri i Jashtëm grek, Kotzias, ka konfirmuar se tre vende kanë rezerva.
Bashkimi Evropian ka dështuar në gjetjen e një konsensusi për të votuar të enjten hapjen e negociatave me Shqipërinë dhe Maqedoninë. Këtë lajm e përcjell media austriake “Salsburger Nachrichten”, e cila duke cituar ministrin e Jashtëm grek, Nikos Kotzias, vendos 25 vende pro hapjes së negociatave dhe 3 kundër. Këto 3 vende janë: Danimarka, Holanda dhe Franca. Këto të fundit janë shprehur se duhet të shohin procesin, stabilitetin.
“Janë dy grupe vendesh, një që është më i madhi, 25 vende, mbështet të hapë negociatat në samitin e 2019 dhe 3 vende, Danimarka, Holanda dhe Franca që thonë se duhet të shohin procesin, procesin evropian, stabilitetin dhe sigurinë e gjithë rajonit në Evropën Juglindore.
Dhe kjo është shumë e rëndësishme për të gjithë në BE. E di që disa vende frikësohen nga populizmi, po nuk mund të luftojmë populizmin me hapa pas. Disa vende kërkojnë integrim të thelluar dhe pastaj zgjerimin, dhe kanë të drejtë, po u tregova një histori që e di mirë se çfarë ndodhi në vitet ‘90. Eksperienca jonë është se mund të bëjmë në të njëjtën kohë të dy proceset dhe është më e mirë për Evropën”, tha Kotzias para gazetarëve.
I pyetur nëse dy shtetet, Maqedonia dhe Shqipëria të mos çelin njëkohësisht këtë proces, Kotzias tha se nuk është pozitive për fuqinë e rajonit.
