Pavarësisht debatit të drejtoreshës së gjimnazit ‘Sami Frashëri’ në Tiranë me senatorët e të gjitha klasave, gjimnazistët nuk e morën për bazë presionin. Dialogu duket si mjeti i vetëm që kërkon Rama për gjetjen e zgjidhjes, por ende nuk është arritur në një marrëveshje. Të gjitha tentativat e kryeministrit deri më tani kanë qenë të dështuara, pasi studentët kanë marrë një tjetër hov.
Nga 1000 nxënës që ka ‘Sami Frashëri’, 700 prej tyre mësohet se kishin braktisur dje mësimin, për t’u bërë pjesë e protestës. Kjo shifër u konfirmua në debat nga vetë drejtoresha.
70% e nxënësve të këtij gjimnazi protestuan dje përpara Kryeministrisë dhe Ministrisë së Arsimit, për të kërkuar zbatimin e tetë kërkesave. Ndonëse gjimnazistët u kërcënuan me mungesa dhe për rrjedhojë me përjashtim nga shkolla, ata e çuan deri në fund misionin e tyre, duke mos u ndarë nga studentët.
‘Sami Frashëri’ nuk është gjimnazi i vetëm që i është bashkuar protestës, pasi të njëjtin vendim kanë marrë edhe nxënësit e gjimnazeve të tjera.
Ndonëse ka patur mjaft raste ku mes turmës së studentëve janë shfaqur militantë partiakë, rinia ia ka dalë mbanë që të qëndrojnë bashkë, edhe sot në ditën e nëntë të protestës.
