Një vallë e madhe reagimesh euforike ka shpërthyer nga ana e zyrtarëve serbë, raporton B92. Pas mospranimit të Kosovës në Interpol, ishte presidenti Vuçiç i cili reagoi duke e cilësuar zhvillimin si sukses për Serbinë.
Ndërsa, me nota po aq euforike ka reaguar edhe ministri i Jashtëm i serb Daçiç.
Komentet për ngjarjen ai i bëri në një konferencë shtypi të mbajtur pas votimit në Asamblenë e Përgjithshme të Organizatës Ndërkombëtare të Policisë në Dubai.
“Unë nuk kam asnjë detyrim për t’u përmbajtur, dua të them se kjo është një fitore e madhe për Serbinë dhe popullin serb.
Ky është tregues se asgjë nuk mund të bëhet me forcë dhe se asgjë nuk mund të bëhet pa një marrëveshje me Serbinë. Kosova ka bërë gjithçka me forcë, duke filluar nga UNESCO deri te anëtarësimin në Interpol.
Ajo ka vepruar në kundërshtim me të gjithë ligjin ndërkombëtar. Prishtina ka menduar se ishte e mjaftueshme që fuqitë e mëdha t’i shkruanin kërkesat e tyre, t’i dërgonin dhe të gjithë do t’i mbështesin.
Nuk është koha për të qenë euforik, e kam thënë këtë shumë kohë më parë.
U thashë atyre (Prishtinës) të mos aplikojnë dhe të vënë në siklet vetveten, se do të përjetonin një zhgënjim. Unë kam dashur t’i mbroj ata nga turpërimi. Tani, le të justifikojnë veten para popullit të tyre!”, ka thënë Daçiç./TIRANA TODAY/
