Dështimi i Milanit/Nga kinezët 240 milionësh tek Montella dhe Gattuso

Milani ka dështuar në mënyrën më të shëmtuar në finalen e Kupës së Italisë përballë Juventusit. Një ndeshje për tu harruar nga kuqezinjtë e Gattusos të cilët më shumë ndëshkuan veten se i ndëshkuan bardhezinjtë. Me shumë emra të rinj dhe investime që u cilësuan si goditje të mëdha Milani i sezonit 2017/18 mund të cilësohet si dështimi më i madh i kuqezinjve të cilët nuk arritën më shumë se një vend të 6, që edhe ky është i diskutueshëm.Fassone, Montella, Kaliniç, Gattuso, Donnarumma, Mirabelli, Bonucci. Shumë emra të vlerësuar si të rëndësishëm, por që nuk arritën asgjë më shumë se një finale Kupe, ku u gjunjëzuan përballë kampionëve të Juventusit. Milani i sezonit 2017-2018, pas shpenzimeve të verës së kaluar prej 240 milionë eurove, duhej të kishte bërë shumë më tepër.Investitorët kinezë u futën fuqishëm në treg dhe kurrsesi nuk mund të jenë të kënaqur me këto rezultate pavarësisht se projekti i tyre është afatgjatë. Lufta për titullin e Serie A nuk ka marrë aspak formë për Milanin, por përpos kësaj duhet të përballet me Artalantën, Fiorentinën dhe Sampdorian për një vend në garat europiane.Merkato e verës u duk në pamje të parë si gjëja më e bukur që i kishte ndodhur Milanit në vitet e fundit, por që në të vërtetë nuk u përshtatë. Montella ishte dështimi i parë sezonal, ku nuk arriti të përshtaste lojtarët e rinj në ekip dhe morali i tyre ishte përtokë në momentin e shkarkimit. Më pas vjen “egërsira” Gattuso që i dha formë ekipit, por luhatjet e shumta bënë që të mos kishte ecuri të gjatë forma e mirë.  Edhe Mirabelli e Fassone nuk mund të marrin lavdërime festive, duke pasur parasysh krizën e Kalinicit, pak golat e André Silva, vendimet e Bonucci dhe shpërthimin e fundit të Calhanoglu.Sezoni do të quhet i shpëtuar nëse Milani siguron pjesëmarrjen në Europa League, më shumë një ngushëllim se sukses. Gattuso është duke rinovuar, por mund të humbasë një ose dy nga lojtarët e mëdhenj aktualë: Donnarumma dhe Bonucci. Duke pasur parasysh mungesën e pjesëmarrjes në Ligën e Kampionëve, edhe me kupën e dytë europiane për nga rëndësia, përsëri është viti zero i Milanit kinez. Pak për të filluar, shumë për të riparuar…