Babai i 32-vjeçarit që vdiq pas shoqërimit nga policia, Laer Kurtit, ka folur për ngjarjen e rëndë që i ndodhi djalit të tij në ambientet e Komisariatit. Artur Kurti, në një intervistë për “Top Channel”, ka thënë se nuk i kanë dhënë asnjë shpjegim se çfarë ka ndodhur. Në të njëjtën kohë ai pohon se djali i tij nuk ka patur probleme shëndetësore. Artur Kurti, babai i 32-vjeçarit Lear Kurti, që gjeti vdekjen gjatë natës pasi u ndalua nga Patrulla Policore e Komisariatit nr.3, mohon versionin e servirur nga policia se i biri vuante nga epilepsia. Ai thotë se nuk i është dhënë mundësia as të shohë trupin e djalit, dhe nuk i është bërë asnjë shpjegim nga autoritetet. Babai shpjegon më tej se AMP (Ish-Shërbimi për çështjet e Brendshme dhe Ankesat) e ka referuar për më vonë dhënien e informacionit, ndërsa shton se djali nuk ka qenë një person i rrezikshëm.
“Nuk e kam parë trupin e djalit, Kam qenë gjithë natën jashtë morgut, dhe sot dhe nuk më kanë dhënë asnjë lloj shpjegimi”.
A të kanë kontaktuar autoritetet?
Babai: Cilat autoritete? Ato që e kanë mbytur?! Ku ka ktu shtet? Gjeta ata të SHKB -së aty më thanë nuk dimë gjë, kur të bëhen ato… nga ora 10 ose 11 do të të themi.
Të thanë çfarë ka ndodhur?
Babai: Jo s’më dhanë asnjë përgjigje.
Ku ishte Laerti?
Babai: Në rrugë të Zotit ka qenë o motra ime. Nuk ka qenë asnjë person i rrezikshëm për ta trajtuar në ato lloj formash.
A ka pasur djali yt probleme shëndetësore?
Babai: Jo asgjë. Djali ka qenë 2 metra si luan.
