Shtohen edhe më shumë rastet nga radhët e politikanëve në Kosovë, të cilët janë infektuar me koronavirus. Deputetja e Kuvendit të Kosovës nga radhët e AAK-së, Donika Kadaj-Bujupi, ka njoftuar se është testuar për COVID-19 dhe ka dalë pozitive. Përpos saj, pozitivë me koronavirus kanë dalë edhe dy fëmijët e saj. Ajo bashkë me fëmijët e saj janë vetizoluar, duke respektuar rekomandimet e IKSHPK-së.
Statusi
Të dashur miq,
Dje kam rezultuar pozitiv në testin për Covid-19. Njëjtë sikur unë, edhe dy fëmijët e mi, Dardani e Doruntina.
Prej se e kemi marrë testin jemi vetëizoluar dhe do të qëndrojmë kështu duke respektuar rekomandimet e IKShPK, të cilët i falënderoj për punën e pandalshme e të palodhshme.
Është momenti ta ruajmë njëri-tjetrin, duke ndjekur veç tre hapa: mbajtje të maskës, mbajtje të distancës dhe mbajtje të higjienës personale.
