Deputeti i LSI-së, Përparim Spahiu ka dalë në një konferencë për shtyp nga selia e LSI-së, ku ka akuzuar mazhorancën se nuk ka marrë parasysh tre amendimet e propozuara nga kjo forcë politike.
Po ashtu, Spahiu i ka bërë thirrje Kuvendit që të fusë në rend dite propozimin e LSI për statusin e minatorit, për të cilët tha se çdo qeveri është në borxh me këtë shtresë të varfër të qeverisë.
“LSI-ja ka paraqitur tre amendime të cilat fatkeqësisht mazhoranca nuk i mori parasysh, madje ma arrogancë u përgjigj se ne nuk ndryshojmë asgjë. Ndërkohë që kemi ftesë të marrim pjesë në këto diskutime, asgjë nuk merret parasysh. Amendimet e LSI konsistonin në uljen e TVSH-së për produktet e shportës, nuk është një k ërkesë pa logjikë.
Amendimi tjetër që u rrëzua nga qeveria ishte i rritjes së fashës së përjashtimit nga TVSH-ja për bizneset e vogla me xhiro deri në 5 milion, pra të ngeleshim aty ku ky nivel ka qenë.
Po kështu është amendimi për taksën e banesave, e ngritëm edhe në diskutimet në parlament. Ishte një propozim që kërkonte përjashtimin e shtëpisë së parë dhe të ardhurat të kompensoheshin nga tatimi i shtëpive të dytë ose të tretë që qeveria do ta vendoste.
Në mbledhje grupi u diskutua edhe propozimi për statusin e minatorit. Pritej një përgjigje zyrtare, ka kaluar çdo afat dhe nuk kemi një përgjigje. LSI i bën thirrje kuvendit ta fusë sa më shpejt në rend dite në diskutimet në komisione dhe nen për nen të statusit të minatorit.
Të gjitha qeveritë janë në borxh ndaj kësaj shtrese mjaft të varfër dhe fare e pambrojtur nga qeveria”, përmbyll Spahiu.
