Është arrestuar në Lushnje një shtetas 43-vjeçarë, i cili rezultonte i dënuar me burgim të përjetshëm, arrestimi është bërë për llogari të drejtësisë greke. Altin Dhamo është dënuar nga Gjykata Përbërë të Betuar Trikalon, ku me vendim të formës së prerë Nr.73-78/3-11-1998 të Gjykatës së Përbërë të Betuar të Larisës, Greqi është shpallur fajtorë për një sërë veprash penale.
Njoftimi i Policisë:
Finalizohet me sukses operacioni policor i koduar “Trikalon”.
Policia e Lushnjes kap dhe ndalon një shtetas të dënuar me burgim të përjetshëm.
Specialistët për Hetimin e Krimeve në Komisariatin e Policisë Lushnje bënë të mundur kapjen dhe ndalimin e shtetasit:
Altin Dhamo, 43 vjeç, banues në lagjen “Kadri Qystri”, Lushnje.
Kapja dhe ndalimi i këtij shtetasi u bë pasi Prokuroria Pranë Gjykatës së Shkallës së Parë Lushnje në datën 02.03.2018, ka urdhëruar ekzekutimin e vendimit penal të datës 28.02.2018 të Gjykatës së Shkallës së Parë Lushnje e cila ka caktuar masën e sigurisë “Arrest me burg” për këtë shtetas.
Kjo masë sigurie është vendosur për llogari të Gjykatës së Përbërë të Betuar Trikalon, Greqi, e cila me vendim të formës së prerë Nr.73-78/3-11-1998 të Gjykatës së Përbërë të Betuar të Larisës, Greqi, e ka deklaruar fajtor shtetasin Altin Dhamo për veprat penale “Vrasje me dashje”, Vjedhje me dhunë” e kryer në bashkëpunim, e mbetur në tentativë, “Vjedhje e kryer në bashkëpunim”, “Armbajtje pa leje”, të parashikuara nga Kodi Penal Grek dhe e ka dënuar atë me burgim të përjeteshëm.
Materialet procedurale i kaluan Prokurorisë Pranë Gjykatës së Shkallës së Parë Lushnje për veprime të mëtejshme.
